எஸ்.டி.ஆர். சாமுவேல் ராஜுக்கு மீண்டும் மாவட்டச் செயலாளர் பதவி, ஸ்ரீவைகுண்டம் எம்.எல்.ஏ. வி.ஜி. சரவணனுக்கு அமைச்சரவையில் இடம் வழங்க நாடார் இயக்கங்களின் கூட்டமைப்பு கோரிக்கை!
தூத்துக்குடி: தூத்துக்குடி மாவட்ட நாடார் இயக்கங்களின் கூட்டமைப்பு சார்பில் வெளியிடப்பட்டுள்ள அறிக்கையில், தமிழக வெற்றிக் கழகத்திற்கு வாழ்த்து தெரிவிப்பதுடன், தூத்துக்குடி மாவட்டத்தில் நாடார் சமுதாயத்திற்கு உரிய அரசியல் பிரதிநிதித்துவம் வழங்க வேண்டும் என வலியுறுத்தப்பட்டுள்ளது.
தமிழகத்தில் நடைபெற்ற மதுராந்தகம், தாராபுரம் இடைத்தேர்தல்களில் வெற்றி பெற்ற தமிழக வெற்றிக் கழகத்திற்கு தூத்துக்குடி மாவட்ட நாடார் இயக்கங்களின் கூட்டமைப்பு சார்பில் வாழ்த்துகள் தெரிவிக்கப்பட்டுள்ளது. தமிழகத்தில் நிலையான ஆட்சி நிலைநிறுத்தப்படுவதை வரவேற்பதாகவும், முதலமைச்சர் மாண்புமிகு ஜோசப் விஜய் அவர்கள் தமிழகத்திற்கு சிறந்த நிர்வாகத்தை வழங்க வேண்டும் என்ற எதிர்பார்ப்புடன் அவரைப் பாராட்டுவதாகவும் கூட்டமைப்பினர் தெரிவித்துள்ளனர்.
அதேநேரத்தில், நாடார் சமுதாய மக்கள் கணிசமான அளவில் வாழும் தூத்துக்குடி மாவட்டத்தில், தமிழக வெற்றிக் கழக ஆட்சியில் நாடார் சமுதாயம் அரசியல் ரீதியாகப் புறக்கணிக்கப்படுகிறதோ என்ற அச்சம் ஏற்பட்டுள்ளதாகக் கூட்டமைப்பு கவலை தெரிவித்துள்ளது.
தூத்துக்குடி சட்டமன்றத் தொகுதியில் வெற்றி பெற்று அமைச்சராகப் பொறுப்பேற்றுள்ள ஸ்ரீநாத் அவர்கள், சாதி, மத வேறுபாடுகளுக்கு அப்பாற்பட்டு செயல்பட வேண்டும் என்பதே தங்களது எதிர்பார்ப்பு எனக் குறிப்பிட்டுள்ள கூட்டமைப்பினர், அவரைச் சுற்றியுள்ள சிலர் குறிப்பிட்ட சாதி வட்டத்திற்குள் அவரைக் கட்டுப்படுத்த முயற்சிப்பதாகத் தகவல்கள் வெளியாகி வருவதாகவும் தெரிவித்துள்ளனர்.
மேலும், தூத்துக்குடி மாவட்டத்தில் நாடார் சமுதாயத்தின் அரசியல் செல்வாக்கு முடிந்துவிட்டதாகவும், இனி தங்களது சமுதாயத்தைச் சேர்ந்தவர்களே எம்.எல்.ஏ., எம்.பி. உள்ளிட்ட மக்கள் பிரதிநிதிகளாக வருவார்கள் என்றும் சிலர் பேசுவதாகவும், இதுபோன்ற கருத்துகள் சமூக ஊடகங்களில் பரப்பப்படுவதாகவும் கூட்டமைப்பு சுட்டிக்காட்டியுள்ளது.
மக்களின் ஆதரவைப் பெறுபவர்கள் யார் வேண்டுமானாலும் மக்கள் பிரதிநிதிகளாக வரலாம் என்பதில் மாற்றுக் கருத்தில்லை. ஆனால், ஒரு பெரும்பான்மைச் சமுதாயத்தை இலக்காகக் கொண்டு அரசியல் ரீதியாகப் பேசுவதையும், அந்தச் சமுதாயத்தின் பங்களிப்பைக் குறைத்து மதிப்பிடுவதையும் ஏற்றுக்கொள்ள முடியாது எனக் கூட்டமைப்பினர் தெரிவித்துள்ளனர்.
தமிழக வெற்றிக் கழக நிர்வாகத்தில் உரிய பிரதிநிதித்துவம் தேவை
ஆறு சட்டமன்றத் தொகுதிகளைக் கொண்ட தூத்துக்குடி மாவட்டத்தில், தமிழக வெற்றிக் கழகத்தின் மாவட்டச் செயலாளர் பொறுப்புகளில் நாடார் சமுதாயத்தைச் சேர்ந்த ஒருவர் கூட இல்லாத நிலை கவலை அளிப்பதாகக் கூட்டமைப்பு தெரிவித்துள்ளது.
ஒருவருக்கு கட்சிப் பதவி வழங்குவது என்பது அந்தந்தக் கட்சியின் உள்விவகாரம் என்றாலும், கட்சியின் வளர்ச்சிக்கும் நிர்வாகத்திற்கும் பங்களிக்கும் நாடார் சமுதாயத்தினருக்கும் உரிய வாய்ப்புகள் கிடைக்க வேண்டும் என்பதே தங்களது கோரிக்கை எனக் குறிப்பிட்டுள்ளனர்.
ஏற்கனவே தூத்துக்குடி மத்திய மாவட்டச் செயலாளராகப் பொறுப்பு வகித்த எஸ்.டி.ஆர். சாமுவேல் ராஜ் அவர்கள் அப்பதவியிலிருந்து நீக்கப்பட்டது நாடார் சமுதாய மக்களிடையே அதிர்ச்சியை ஏற்படுத்தியுள்ளதாகவும், அவருக்கு மீண்டும் மாவட்டச் செயலாளர் பதவி வழங்குவதன் மூலம் அரசியல் பிரதிநிதித்துவம் தொடர்பான அதிருப்தியைக் குறைக்க முடியும் என்றும் கூட்டமைப்பினர் தெரிவித்துள்ளனர்.
வி.ஜி. சரவணனுக்கு அமைச்சரவையில் இடம் வழங்கக் கோரிக்கை
தமிழக சட்டமன்றத்தின் முந்தைய 16 ஆட்சிக் காலங்களிலும் நாடார் சமுதாயத்திற்கு உரிய அங்கீகாரம் வழங்கப்பட்டு, அமைச்சரவையிலும் வாய்ப்புகள் அளிக்கப்பட்டு வந்ததாகக் கூட்டமைப்பு குறிப்பிட்டுள்ளது. ஆனால், தற்போதைய 17-வது சட்டப்பேரவையில் நாடார் சமுதாயத்திற்கு உரிய விகிதாசார அடிப்படையிலான அமைச்சரவைப் பிரதிநிதித்துவம் கிடைக்காதது வேதனைக்குரியதாக உள்ளதாகத் தெரிவித்துள்ளது.
எனவே, தூத்துக்குடி மாவட்ட நாடார் சமுதாய மக்களின் அரசியல் பிரதிநிதித்துவத்தை உறுதிப்படுத்தும் வகையில், ஸ்ரீவைகுண்டம் சட்டமன்ற உறுப்பினர் வி.ஜி. சரவணன் அவர்களுக்கு அமைச்சரவையில் இடம் வழங்க வேண்டும் என்று தமிழக முதலமைச்சர் மற்றும் தமிழக வெற்றிக் கழகத் தலைமைக்கு கூட்டமைப்பு கோரிக்கை விடுத்துள்ளது.
நாடார் சமுதாயத்தின் பங்களிப்பை அரசியல் கட்சிகள் உணர வேண்டும்
தொழில் நிறுவனங்கள், கல்வி நிறுவனங்கள் உள்ளிட்ட பல்வேறு துறைகளில் பங்களித்து தமிழகத்தின் பொருளாதார வளர்ச்சியில் முக்கிய இடம் வகிக்கும் நாடார் சமுதாயம், அரசியலிலும் உரிய பங்களிப்பைச் செலுத்த வேண்டியது அவசியம் எனக் கூட்டமைப்பு வலியுறுத்தியுள்ளது.
தூத்துக்குடி மாவட்டத்தில் தற்போது நிலவி வரும் அரசியல் சூழலை தமிழக வெற்றிக் கழகத்தின் மாநில நிர்வாகிகள் ஆழமாக ஆய்வு செய்து, நாடார் சமுதாய மக்களின் கோரிக்கைகளுக்குத் தீர்வு காண வேண்டும் என்றும் கேட்டுக்கொண்டுள்ளது.
இக்கோரிக்கைகள் உரிய முறையில் பரிசீலிக்கப்படாவிட்டால், எதிர்காலத்தில் ஒட்டுமொத்த நாடார் சமுதாயத்தினரும் தமிழக வெற்றிக் கழகத்திற்கு எதிரான நிலைப்பாட்டை எடுக்கக்கூடிய சூழல் உருவாகலாம் என்றும் கூட்டமைப்பு எச்சரித்துள்ளது. அத்தகைய சூழல் ஏற்படக் கூடாது என்பதே தங்களது நோக்கம் என்றும், அனைத்து சமுதாயங்களுக்கும் உரிய அரசியல் அங்கீகாரமும் சம வாய்ப்பும் கிடைக்க வேண்டும் என்பதே தங்களது எதிர்பார்ப்பு என்றும் தெரிவித்துள்ளது.
நிகழ்வில் பங்கேற்றவர்கள்:
எஸ்.பி. சிலுவை நாடார் – சான்றோர் வழக்கறிஞர் கூட்டமைப்பு, தமிழ்நாடு; எம். அற்புதராஜ் – மாவட்டச் செயலாளர், சமத்துவ மக்கள் கழகம்; எஸ்.பி. மாரியப்பன் – நிறுவனத் தலைவர், பெருந்தலைவர் மக்கள் நலச் சங்கம்; எம்.எம். டேவிட் – பாண்டியனார் மக்கள் இயக்கம்; டி. சங்கர் – நாடார் பேரவை மாவட்டப் பிரதிநிதி; ஏ. பாலகிருஷ்ணன் – மாவட்டத் தலைவர், நாடார் மகாஜன சங்கம்; எஸ்.டி.கே. சிவா – தென் மண்டலத் தலைவர், தமிழ்நாடு நாடார் சங்கம்; கே.கே.எஸ். அழகு மந்திரி – மாநிலப் பொதுச் செயலாளர், தமிழ்நாடு காமராஜர் பேரவை; டி.எஸ். ரமேஷ் பாலன் – தெற்கு மண்டலச் செயலாளர், தமிழ்நாடு காமராஜர் பேரவை உள்ளிட்டோர் கலந்து கொண்டனர்.
