தூத்துக்குடி மாநகராட்சிக்குட்பட்ட மில்லர்புரம் சிலோன் காலனி 2-வது தெருவில் கழிவுநீர் குழாய் நிரம்பி, கழிவுநீர் சாலையில் வழிந்தோடும் நிலை ஏற்பட்டுள்ளதாக அப்பகுதி பொதுமக்கள் புகார் தெரிவித்துள்ளனர்.
கழிவுநீர் குழாய் நிரம்பி தொடர்ந்து கழிவுநீர் வெளியேறி வருவதால், அப்பகுதியில் துர்நாற்றம் வீசுவதுடன் சுகாதார சீர்கேடு ஏற்படும் சூழ்நிலை நிலவி வருவதாக பொதுமக்கள் தெரிவிக்கின்றனர்.
இதுகுறித்து சம்பந்தப்பட்ட வார்டு கவுன்சிலரிடம் அப்பகுதி மக்கள் ஏற்கனவே முறையிட்டதாக கூறப்படுகிறது. ஆனால், இதுவரை உரிய நடவடிக்கை எடுக்கப்படவில்லை என பொதுமக்கள் குற்றம் சாட்டுகின்றனர்.
தற்போது கழிவுநீர் தொடர்ந்து வழிந்தோடுவதால் பொதுமக்கள், குறிப்பாக குழந்தைகள் மற்றும் முதியவர்கள் சிரமத்திற்கு உள்ளாகி வருகின்றனர். மேலும், கொசு உற்பத்தி மற்றும் நோய் தொற்று ஏற்படும் அபாயமும் இருப்பதாக அப்பகுதி மக்கள் அச்சம் தெரிவிக்கின்றனர்.
எனவே, சம்பந்தப்பட்ட மாநகராட்சி அதிகாரிகள் உடனடியாக மில்லர்புரம் சிலோன் காலனி 2-வது தெருவில் நேரில் ஆய்வு செய்து, கழிவுநீர் குழாய் அடைப்பை சரிசெய்து, சாலையில் தேங்கியுள்ள கழிவுநீரை அகற்ற நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.
“கவுன்சிலரிடம் முறையிட்டும் நடவடிக்கை இல்லை; இனியாவது மாநகராட்சி அதிகாரிகளின் கவனத்திற்கு சென்று பிரச்சினை தீருமா?” என அப்பகுதி பொதுமக்கள் கேள்வி எழுப்பியுள்ளனர்.
