தூத்துக்குடி முத்தையாபுரம் பகுதியில் திறந்தவெளி வாய்க்காலால் பொதுமக்களுக்கு ஆபத்து உடனடி நடவடிக்கை எடுக்க சட்ட உரிமைகள் கழகம் சாா்பில் வலியுறுத்தல்

தூத்துக்குடி மாநகராட்சி, முத்தையாபுரம் பகுதியில் உள்ள 52வது வார்டு, தெற்கு மண்டலத்திற்கு அருகிலுள்ள கிருஷ்ணாநகர் பகுதியில் தார் சாலையோரம் செல்லும் மழைநீர் மற்றும் கழிவுநீர் வாய்க்கால்களுக்கு சிமெண்ட் மூடிகள் அமைக்கப்படாமல் திறந்த நிலையில் உள்ளன. இதனால் பொதுமக்கள், குறிப்பாக இரவு நேரங்களில் செல்லும் வாகன ஓட்டிகள், குழந்தைகள் மற்றும் முதியவர்கள் வாய்க்காலுக்குள் தவறி விழும் அபாயம் உள்ளது. ஏற்கனவே பலர் அதில் விழுந்துள்ளதாகப் பொதுமக்கள் தெரிவிக்கின்றனர். பொதுமக்கள் பாதுகாப்பாகப் பயணிக்க வேண்டிய சாலையோரத்தில் இத்தகைய ஆபத்தான நிலை நீடிப்பது கண்டிக்கத்தக்கது. எனவே, சம்பந்தப்பட்ட மாநகராட்சி மற்றும் தெற்கு மண்டல அதிகாரிகள் உடனடியாக அப்பகுதியை நேரில் ஆய்வு செய்து, திறந்த வாய்க்கால்களுக்கு உறுதியான சிமெண்ட் மூடிகள் அமைக்க வேண்டும். உடனடியாக மூடிகள் அமைக்க இயலாத இடங்களில் பாதுகாப்புத் தடுப்புச் சுவர் அல்லது தடுப்புகளை ஏற்படுத்த வேண்டும். அதுவரை எச்சரிக்கைப் பலகைகள் மற்றும் இரவில் தெளிவாகத் தெரியும் ஒளிரும் குறியீடுகளை அமைக்க வேண்டும். ஆபத்தான வாய்க்கால் பகுதிகளை முழுமையாகச் சீரமைத்து, பொதுமக்களின் பாதுகாப்பை உறுதி செய்ய வேண்டும். பொதுமக்களின் உயிருக்கும் பாதுகாப்புக்கும் அச்சுறுத்தலாக உள்ள இந்தப் பிரச்சினையை அதிகாரிகள் அலட்சியம் செய்யாமல், உடனடியாகத் தீர்வு காண வேண்டும் என சட்ட உரிமைகள் கழக நிறுவனத்தலைவர் வக்கீல் செல்வம் கிறிஸ்டோபா் வலியுறுத்தியுள்ளாா்