கோவை. அக்., 16 :
கடன் பெற்றுத் தருவதாகக் கூறி ரூ.22.25 லட்சம் மோசடி செய்யப்பட்டதாக கோவை மாநகர காவல் ஆணையரிடம் 3 பேர் புகார் மனு அளித்துள்ளனர். இன்று செய்தியாளர்களை சந்தித்த தூத்துக்குடி மாவட்டத்தைச் சேர்ந்த நாகராஜ், ரேவதி, தமிழ்ச்செல்வன் ஆகியோர் அளித்துள்ள புகாரில், கோவை கணபதியைச் சேர்ந்த தீபக் என்பவர் அவரது கூட்டாளிகளான விக்னேஷ், அஜீவ், ராகுல் ஆகியோருடன் சேர்ந்து கூட்டுச்சதி செய்து தங்களை ஏமாற்றியதாக தெரிவித்துள்ளனர்.
அமைச்சர் மற்றும் முக்கிய பிரமுகர்களின் பல கோடி ரூபாய் நிதி ஆதாரம் தங்களிடம் உள்ளதாகக் கூறி நம்ப வைத்த எதிரிகள், எந்தவித விற்பனை அல்லது அடமான ஆவணமும் இல்லாமல் குறைந்த வட்டிக்கு கடன் பெற்றுத் தருவதாக ஆசை வார்த்தை கூறியுள்ளனர். ரேவதிக்கு 2 கோடி ரூபாய் வரையும், நாகராஜுக்கு 40 லட்சம் ரூபாய் வரையும், தமிழ்ச்செல்வனுக்கு 25 லட்சம் ரூபாய் வரையும் கடன் பெற்றுத் தருவதாக கூறியுள்ளனர். இதற்காக Loan Processing Fee என்ற பெயரில் பணம் செலுத்த வேண்டும் என கட்டாயப்படுத்தி, பண பரிவர்த்தனை குறித்து செல்போனில் பேசக்கூடாது, யாரிடமும் சொல்லக்கூடாது என்றும் தெரிவித்துள்ளனர்.
இதனை நம்பி பாதிக்கப்பட்டவர்கள் 19.01.2025 அன்று கோவை ரேஸ்கோர்ஸ் பகுதியில் உள்ள Welcome ITC ஹோட்டலில் வைத்து ரூ.14,35,000/- பணத்தையும், 29.01.2025 அன்று தூத்துக்குடியில் வைத்து ரூ.7,90,000/- பணத்தையும் என மொத்தம் ரூ.22,25,000/- பணத்தை எதிரிகளிடம் வழங்கியுள்ளனர். பணத்தை பெற்றுக்கொண்ட எதிரிகள் கடனும் பெற்றுத் தராமல், பணத்தையும் திருப்பித் தராமல் இன்று நாளை என காலம் கடத்தி வந்துள்ளனர். பணம் கேட்டு தொலைபேசியில் தொடர்புகொண்டாலோ அல்லது காவல் துறையில் புகார் அளித்தாலோ மூன்று பேரையும் சுட்டுக் கொலை செய்து விடுவோம் என மிரட்டியுள்ளனர். மேலும் பாதிக்கப்பட்டவர்களிடம் இருந்து பல வெற்றுப் பத்திரங்கள் மற்றும் புரோநோட்டுகளில் கையெழுத்து, கைரேகைகளைப் பெற்றுச் சென்றுள்ளனர். அதன் நகல்களையும் வழங்கவில்லை.
இந்நிலையில் தங்களை ஏமாற்றிய அதே தீபக் கும்பல் மீது இதே பாணியில் ரூ.6.50 கோடி மோசடி செய்ததாக கோவையைச் சேர்ந்த முருகானந்தம் என்பவர் அளித்த புகாரின் பேரில் கோவை மாநகர மத்திய குற்றப்பிரிவில் (CCB-I) 12.08.2026 அன்று http://Cr.No: 0025/2026 என்ற எண்ணில் FIR பதிவு செய்யப்பட்டு விசாரணை நிலுவையில் உள்ளதை அறிந்து கொண்டதாக பாதிக்கப்பட்டவர்கள் தெரிவித்துள்ளனர். தீபக் மற்றும் அவரது கூட்டாளிகள் இதே முறையில் தமிழ்நாடு மற்றும் பிற மாநிலங்களைச் சேர்ந்த பல நபர்களிடம் மோசடி செய்துள்ளதாகவும், அவர்கள் மீது பல்வேறு இடங்களில் வழக்குகள் உள்ளதாகவும் தகவல் கிடைத்துள்ளது.
எனவே தங்களையும் அதே Welcome ITC ஹோட்டலில் வைத்துதான் ஏமாற்றியுள்ளதால், தங்களது புகாரையும் தற்போது நிலுவையில் உள்ள http://Cr.No: 0025/2026 வழக்கோடு இணைத்து, தங்களை கூடுதல் பாதிக்கப்பட்ட சாட்சிகளாக சேர்க்க வேண்டும் எனவும், மோசடி செய்யப்பட்ட ரூ.22,25,000/- பணத்தையும், தங்களிடம் இருந்து பெறப்பட்ட கையெழுத்திட்ட ஆவணங்களையும் மீட்டுத் தந்து, அதனை தவறாக பயன்படுத்துவதை தடுக்க உரிய சட்ட நடவடிக்கை எடுக்க வேண்டும் எனவும் புகாரில் கோரிக்கை விடுத்துள்ளனர்.
