தூத்துக்குடி மாவட்டம், குலசேகரப்பட்டினத்தில் உலகப் புகழ்பெற்ற முத்தாரம்மன் திருக்கோவிலில் தசரா திருவிழா தொடங்கி நடைபெற்று வருகிறது. இதையொட்டி, அம்மனுக்கு மாலை அணிவித்து விரதம் இருந்து வரும் பக்தர்கள் பல்வேறு வகைகளில் நேர்த்திக்கடன் செலுத்தி வருகின்றனர். அதன் ஒரு பகுதியாக, தூத்துக்குடி மாநகரில் முத்தாரம்மன் பக்தர் செல்வமணி என்பவர் பறவை காவடி எடுத்து நேர்த்திக்கடன் செலுத்தினார்.
தூத்துக்குடி மாநகரில் அமைந்துள்ள சந்தன மாரியம்மன் கோவிலில் இருந்து டாடா ஈச்சர் சரக்கு லாரி வாகனத்தில் பறவை காவடி ஊர்வலம் தொடங்கியது. இதில், செல்வமணி உடலில் கொக்கிகள் குத்தி, தொங்கியபடி பறவை காவடி எடுத்து தனது நேர்த்திக்கடனைச் செலுத்தினார். கடந்த 7 ஆண்டுகளாக தொடர்ந்து பறவை காவடி எடுத்து வரும் அவர், இந்த ஆண்டும் 8வது வருடமாக தனது நேர்த்திக்கடனைத் தொடர்ந்து நிறைவேற்றினார். தொடர்ந்து, முக்கிய சாலையான மெயின் ரோடு வழியாக 6 கிலோமீட்டர் தூரம் பறவை காவடி ஊர்வலம் நடைபெற்றது.
பின்னர் தாளமுத்துநகரில் அமைந்துள்ள ஸ்ரீ முத்தாரம்மன் திருக்கோவிலில் ஊர்வலம் நிறைவடைந்தது. நிகழ்ச்சியில் திரளான பக்தர்கள் கலந்து கொண்டு அம்மனை வழிபட்டனர்.
