தமிழக அரசுக்கு அவசரக் கோரிக்கை

தூத்துக்குடி மாவட்ட நாடார் இயக்கங்களின் கூட்டமைப்பு சார்பில்

பொருள்: தூத்துக்குடி வேலவன் ஜுவல்லர்ஸ் தொடர்பாக நிலவி வரும் தகவல்கள் குறித்து உண்மை நிலையை வெளிக்கொணர உடனடி தரக்கட்டுப்பாட்டு ஆய்வு மற்றும் விசாரணை நடத்தக் கோரிக்கை.

தூத்துக்குடி மாவட்ட நாடார் இயக்கங்களின் கூட்டமைப்பின் நிர்வாகிகள் கூட்டம் 21.06.2026 அன்று நடைபெற்றது. அக்கூட்டத்தில், கடந்த சில நாட்களாக வலைதளங்கள் மற்றும் செய்தி ஊடகங்களில் தூத்துக்குடி வேலவன் ஸ்டோர் மற்றும் அதன் கட்டுப்பாட்டில் செயல்படும் வேலவன் ஜுவல்லர்ஸ் தொடர்பாக பல்வேறு தகவல்கள் வெளியாகி வருவது குறித்து விரிவாக ஆலோசிக்கப்பட்டது.

மேலும், வேலவன் ஸ்டோர் நிர்வாகத்தினருக்கு சில சமூக அமைப்புகளைச் சேர்ந்த நபர்கள் மிரட்டல் விடுத்ததாகவும் தகவல்கள் வெளியாகியுள்ள நிலையில், இதுகுறித்த உண்மை நிலை சட்டரீதியாகவும், ஆதாரப்பூர்வமாகவும் கண்டறியப்பட வேண்டும் என்பதே கூட்டமைப்பின் நிலைப்பாடாகும்.

நாடார் சமுதாயத்தைச் சேர்ந்த தொழிலதிபர்கள் மற்றும் வணிகர்கள் நேர்மையான முறையில் தொழில் செய்து வருவதுடன், தங்களது தொழில் நிறுவனங்கள் தொடர்பான உரிய தரக்கட்டுப்பாட்டு மற்றும் சட்டப்பூர்வ சோதனைகளுக்கு ஒத்துழைக்க எப்போதும் தயாராக உள்ளனர்.

எனவே, தமிழ்நாடு அரசு உடனடியாக வேலவன் ஜுவல்லர்ஸ் நிறுவனத்தில் உள்ள தங்க நகைகளின் தரத்தை உரிய அரசு அங்கீகரிக்கப்பட்ட தரக்கட்டுப்பாட்டு அதிகாரிகள் மூலம் முழுமையாக ஆய்வு செய்து, அதன் முடிவுகளை வெளிப்படையாக பொதுமக்களுக்கு அறிவிக்க வேண்டும் என தூத்துக்குடி மாவட்ட நாடார் இயக்கங்களின் கூட்டமைப்பு கோரிக்கை விடுக்கிறது.

இதன்மூலம் தற்போது நிலவி வரும் சந்தேகங்களுக்கும் வதந்திகளுக்கும் முற்றுப்புள்ளி வைத்து, உண்மை நிலை என்ன என்பதை பொதுமக்கள் தெளிவாக அறிந்து கொள்ள முடியும். மேலும், எந்த ஒரு சமூகத்தையும் சார்ந்த தொழிலதிபர்கள் அல்லது வணிகர்கள் மீது ஆதாரமற்ற குற்றச்சாட்டுகள் மற்றும் சமூக ரீதியான அழுத்தங்கள் ஏற்படாத வகையில் அரசு உரிய நடவடிக்கை எடுக்க வேண்டும்.

அதேபோல், வேலவன் ஸ்டோர் நிர்வாகத்திற்கு எதிராக சாதி ரீதியான தாக்குதல் அல்லது மிரட்டல் தொடர்பாக புகார் கூறப்படும் நபர்கள் குறித்து காவல்துறை உரிய விசாரணை நடத்தி, குற்றம் நிரூபிக்கப்பட்டால் சட்டப்படி நடவடிக்கை எடுக்க வேண்டும் எனவும் கூட்டமைப்பு கோருகிறது.

மேலும், மேற்கண்ட சம்பவங்கள் தொடர்பாக அனைத்து தரப்பினரிடமிருந்தும் உண்மையான தகவல்களை சேகரித்து, தேவையானால் சிபிசிஐடி விசாரணை நடத்தி உண்மை நிலையை வெளிக்கொண்டு வர வேண்டும் எனவும் தமிழக அரசிடம் கோரிக்கை வைக்கப்படுகிறது.

உண்மை வெளிவருவதும், சட்டம் அனைவருக்கும் சமமாக நடைமுறைப்படுத்தப்படுவதும், சமூகங்களுக்கிடையே நிலவும் பதற்றம் குறைந்து அமைதியான சூழல் உருவாவதும் தமிழகத்தின் ஒற்றுமைக்கும் வளர்ச்சிக்கும் அவசியமானதாகும்.

எனவே, தமிழக அரசு இவ்விவகாரத்தில் உடனடியாக தலையிட்டு, உண்மை நிலையை வெளிப்படுத்தி, சட்டத்தின் அடிப்படையில் உரிய நடவடிக்கைகளை மேற்கொள்ள வேண்டும்.

இப்படிக்கு,
தூத்துக்குடி மாவட்ட நாடார் இயக்கங்களின் கூட்டமைப்பு
நிர்வாகிகள் சார்பில்