தூத்துக்குடி தமிழகத்தில் தற்போது நிலவி வரும் மின்சார தட்டுப்பாடு, பொதுமக்கள் மற்றும் தொழில் துறையினர் மத்தியில் பெரும் அதிருப்தியையும், கவலையையும் ஏற்படுத்தியுள்ளது. மின்சாரம் சீராக கிடைக்காததால், சிறு, குறு மற்றும் நடுத்தர தொழிற்சாலைகள் உள்ளிட்ட பல தொழிற்சாலைகள் தொடர்ந்து இயங்க முடியாமல் மூடப்படும் நிலைக்கு தள்ளப்பட்டுள்ளன. சில தொழிற்சாலைகள் ஏற்கனவே மூடப்பட்டுவிட்டன. இன்னும் சில தொழிற்சாலைகள் மூடப்படும் அபாயத்தில் உள்ளன. தொழிற்சாலைகள் மூடப்பட்டதால், அங்கு பணிபுரிந்து வந்த தொழிலாளர்கள், ஒப்பந்த பணியாளர்கள், தினக்கூலி தொழிலாளர்கள் உள்ளிட்ட பல்வேறு தரப்பினரும் வேலைவாய்ப்புகளை இழந்து தவித்து வருகின்றனர். ஒரு குடும்பத்தில் ஒருவருக்கு வேலை போனாலே அந்த குடும்பமே தடுமாறும் நிலையில், தற்போது பல குடும்பங்கள் ஒரே நேரத்தில் வருமானத்தை இழந்து நிற்கின்றன. இளைஞர்களுக்கு புதிய வேலைவாய்ப்புகள் கிடைப்பது மிகவும் அரிதாகிவிட்டது. வேலைவாய்ப்பு என்பது இன்றைக்கு குதிரைக் கொம்பாக மாறி வருகிறது என்று பொதுமக்கள் வேதனையுடன் தெரிவிக்கின்றனர்.
இந்நிலையில் ஸ்டெர்லைட் பசுமை தாமிர தொழிற்சாலையை மீண்டும் திறக்க வேண்டும், மின்சார உற்பத்தியை பெருக்க வேண்டும், தங்களுக்கு நிரந்தர வேலைவாய்ப்புகளை வழங்க வேண்டும் என்று வலியுறுத்தி பொதுமக்கள் இரண்டு இடங்களில் ஆர்ப்பாட்டத்தில் ஈடுபட்டனர். சோரீஸ்புரம் பகுதியில் நடைபெற்ற ஆர்ப்பாட்டத்திற்கு சுரேஷ் என்ற பாலமுருகன் தலைமை தாங்கினார். இதில் 500-க்கும் மேற்பட்ட பொதுமக்கள் கலந்து கொண்டனர். சோரீஸ்புரம் அருகில் உள்ள ஈபி காலனியில், பெரியதுறை சார்பில் நூற்றுக்கும் மேற்பட்ட பொதுமக்கள் பங்கேற்ற மற்றொரு ஆர்ப்பாட்டம் நடைபெற்றது.
ஆா்ப்பாட்டத்தில் தூத்துக்குடி ஸ்டெர்லைட் ஆலையை உடனடியாக திறக்க வேண்டும். பசுமை தாமிர உற்பத்தி ஆலையை உருவாக்கி செயல்படுத்த வேண்டும். தமிழகத்தில் நிலவும் மின்சார தட்டுப்பாட்டை போக்கி, மின்சார உற்பத்தியை பெருக்க வேண்டும். மூடப்பட்ட தொழிற்சாலைகளால் வேலை இழந்தவர்களுக்கும், இளைஞர்களுக்கும் வேலைவாய்ப்புகளை உருவாக்கி வழங்க வேண்டும். இந்த கோரிக்கைகளை வலியுறுத்தி பொதுமக்கள் கோஷங்களை எழுப்பினர். இரண்டு ஆர்ப்பாட்டங்களிலும் ஆண்கள், பெண்கள், இளைஞர்கள், முதியவர்கள் வேலை இழந்த குடும்பத்தினர் மற்றும் வேலை தேடும் இளைஞர்கள் அதிக அளவில் கலந்து கொண்டனா்.