சாயர்புரம் போப் கல்லூரியில் சர்வதேச யோகா தின விழா: சிறப்பு விருந்தினராக முன்னாள் மாணவர் பெத்து விஷ்ணு பங்கேற்று மாணவர்களுக்கு யோகா பயிற்சி!!!

ஸ்ரீவைகுண்டம், ஜூன் 24

தூத்துக்குடி மாவட்டம், சாயர்புரம் போப் கலை மற்றும் அறிவியல் கல்லூரியில் சர்வதேச யோகா தினத்தை முன்னிட்டு நடைபெற்ற யோகா விழிப்புணர்வு நிகழ்ச்சியில், கல்லூரியின் முன்னாள் மாணவரும் சமூக ஆர்வலருமான **பெத்து விஷ்ணு** சிறப்பு விருந்தினராக கலந்து கொண்டு மாணவர்களுக்கு யோகா பயிற்சி அளித்து சிறப்புரையாற்றினார்.

நிகழ்ச்சியில் பேசிய பெத்து விஷ்ணு, இன்றைய வேகமான வாழ்க்கை முறையில் உடல் ஆரோக்கியம் மட்டுமல்லாமல் மனநலத்தையும் பாதுகாக்க யோகா இன்றியமையாத ஒன்றாக விளங்குகிறது என்று குறிப்பிட்டார். தொடர்ந்து யோகா மனிதனுக்கு தன்னம்பிக்கை, மன அமைதி, கவனச் சிதறலைக் கட்டுப்படுத்தும் திறன், உடல் வலிமை மற்றும் நேர்மறை சிந்தனையை வளர்க்கும் ஒரு வாழ்க்கை முறையாகும் என்றும் எடுத்துரைத்தார்.

மேலும், மாணவர்கள் தினசரி சில நிமிடங்களாவது யோகா பயிற்சியில் ஈடுபட்டால் மனஅழுத்தம், பதற்றம் மற்றும் உடல் சோர்வு போன்ற பிரச்சினைகளை எளிதில் சமாளிக்க முடியும் என அறிவுறுத்தினார். பின்னர் பல்வேறு யோகாசனங்கள், சுவாசப் பயிற்சிகள் மற்றும் உடல் நெகிழ்வுத்தன்மையை மேம்படுத்தும் பயிற்சிகளை நேரடியாக செய்து காட்டி, மாணவர்களையும் ஆர்வத்துடன் பங்கேற்கச் செய்தார். முன்னாள் மாணவரான பெத்து விஷ்ணு தனது தாய்க் கல்லூரியில் சிறப்பு விருந்தினராக பங்கேற்று மாணவர்களுடன் கலந்துரையாடி பயிற்சி வழங்கியது அனைவரிடமும் பாராட்டைப் பெற்றது.

இதனைத் தொடர்ந்து தமிழ்த்துறை உதவி பேராசிரியர் ராகினி ஜெமிமா ஆரம்ப ஜெபம் செய்தார். நாட்டு நலப்பணித் திட்ட அலுவலர் முனைவர் ஸ்டான்லி டேவிட் பிச்சை வரவேற்புரையாற்றினார். கல்லூரி முதல்வர் முனைவர் சாந்தினி கிரேஸ் தலைமை தாங்கி, யோகாவின் முக்கியத்துவம் மற்றும் உடல், மன நலனில் அதன் பங்களிப்பு குறித்து மாணவர்களிடம் விளக்கினார்.

கல்லூரி துணை முதல்வர் முனைவர் ஜெபசிங் கோரேஸ் யோகாவின் சிறப்புகள் குறித்து சிறப்புரையாற்றினார். உடற்கல்வி இயக்குநர் முனைவர் ஜோன்ஸ் ராஜன் யோகாவின் நுட்பங்கள் மற்றும் அவற்றின் நடைமுறைப் பயன்கள் குறித்து விளக்கமளித்தார். நிறைவாக தமிழ்த்துறை தலைவர் முனைவர் ஜெமிபிரியா நன்றியுரை ஆற்றினார்.

இந்நிகழ்ச்சியில் பேராசிரியர்கள், நாட்டு நலப்பணித் திட்ட அலுவலர்கள் மற்றும் ஏராளமான மாணவ, மாணவியர்கள் கலந்து கொண்டு பயனடைந்தனர். நிகழ்ச்சியை திட்ட ஒருங்கிணைப்பாளர் தமிழ்த்துறை உதவி பேராசிரியர் சாந்தி மற்றும் தமிழ்த்துறை பேராசிரியர்கள் இணைந்து சிறப்பாக ஏற்பாடு செய்திருந்தனர்.