தூத்துக்குடி மாநகராட்சி யுகே பேக்ட் திட்டத்துடன் இணைந்து, ஐடிடீபி இந்தியா நிறுவனத்தின் தொழில்நுட்ப ஆதரவுடன், மாநகராட்சியால் சமீபத்தில் ஏற்றுக்கொள்ளப்பட்ட ஆரோக்கியமான சாலைகள் கொள்கை மற்றும் விரிவான சாலை மற்றும் தெரு வடிவமைப்பு வழிகாட்டுதல்கள் தொடர்பான திறன் மேம்பாட்டு பயிலரங்கம் மாநகராட்சியில் நடைபெற்றது.
இந்தப் பயிலரங்கு, தூத்துக்குடிக்கான பேக்ட் திட்டத்தின் ஒரு பகுதியாக நடைபெற்றது. இத்திட்டத்தை ஐஐடி மெட்ராஸ் ஐடிடீபி இந்தியா, டிஇஆா்ஐ சிஇஎன்இஎக்ஸ் ஆகிய நிறுவனங்களுடன் இணைந்து முன்னெடுத்து வருகிறது. இத்திட்டம் காலநிலை சார்ந்த நகர்ப்புற திட்டமிடல் மற்றும் போக்குவரத்து அமைப்பை மையமாகக் கொண்டுள்ளது. இப்பயிலரங்கில் தூத்துக்குடி மாநகராட்சியின் அதிகாரிகள் மற்றும் தொழில்நுட்பப் பணியாளர்களுடன், தொடர்புடைய பல்வேறு அரசுத் துறைகளின் பிரதிநிதிகளும் கலந்து கொண்டனர். இதன் மூலம், கொள்கையின் நோக்கங்களை அனைவரும் ஒருங்கிணைந்து புரிந்துகொள்வதுடன், சாலைகள் மற்றும் போக்குவரத்து உட்கட்டமைப்பின் திட்டமிடல், வடிவமைப்பு மற்றும் செயல்படுத்தலில் அவற்றை நடைமுறைப்படுத்துவது குறித்து விவாதிக்கப்பட்டது.
இந்தப் பயிலரங்கு, நகரத்தின் கொள்கை ஏற்றுக்கொள்ளப்பட்ட நிலையிலிருந்து அதன் நடைமுறைச் செயல்பாட்டை நோக்கி நகரும் முயற்சியின் ஒரு பகுதியாகும். ஆரோக்கியமான சாலைகள் கொள்கை மற்றும் விரிவான சாலை மற்றும் தெரு வடிவமைப்பு வழிகாட்டுதல்களை தங்களது பணிப்பகுதிகளில் நடைமுறைப்படுத்துவதற்குத் தேவையான நடைமுறை அறிவு பொறியாளர்கள் மற்றும் அதிகாரிகளுக்கு வழங்கப்பட்டது. பயிலரங்கில் மக்களை மையமாகக் கொண்ட மற்றும் அனைவரையும் உள்ளடக்கிய சாலை வடிவமைப்பு, பொதுப் போக்குவரத்துடன் ஒருங்கிணைப்பு, மோட்டார் வாகனமற்ற போக்குவரத்து வலையமைப்பு திட்டமிடல், அனைவருக்கும் அணுகக்கூடிய வசதிகள் மற்றும் சாலைகள், குடிநீர் கழிவுநீர் வசதிகள், போக்குவரத்து மற்றும் நகர்ப்புற வளர்ச்சிக்கு பொறுப்பான பல்வேறு துறைகளுக்கிடையேயான ஒருங்கிணைப்பை வலுப்படுத்துதல் ஆகியவை குறித்து கவனம் செலுத்தப்பட்டது. மேலும், வலையமைப்பு திட்டமிடல் தொடர்பான நடைமுறைப் பயிற்சியும் நடைபெற்றது. இதன் மூலம் தூத்துக்குடி மாநகரில் முன்னுரிமை அளிக்க வேண்டிய போக்குவரத்து வலையமைப்புகள் மற்றும் மேற்கொள்ள வேண்டிய நடவடிக்கைகளை பங்கேற்பாளர்கள் அடையாளம் காண முடிந்தது.
தூத்துக்குடி மாநகராட்சி ஆணையர் ப்ரியங்கா பல்வேறு துறைகளுக்கிடையே ஒருங்கிணைந்த செயல்பாட்டின் அவசியத்தை வலியுறுத்தி பேசுகையில் “மோட்டார் வாகனமற்ற போக்குவரத்து உட்கட்டமைப்பை மேம்படுத்துவதுடன், பல்வேறு துறைகளுக்கிடையேயான ஒருங்கிணைப்பையும் வலுப்படுத்த வேண்டும். மாநில அளவில் செயல்படுத்தப்படும் போன்ற முக்கிய திட்டங்களும் உள்ளன. நகரத்திற்கான ஒருங்கிணைந்த பார்வையை அனைவரும் புரிந்துகொண்டு, அதை நோக்கி ஒன்றிணைந்து செயல்படுவதற்கு இந்தத் திறன் மேம்பாட்டு பயிலரங்கு சிறந்த வாய்ப்பாக அமைந்துள்ளது.”என்றாா்
மேயர் ஜெகன் பொியசாமி மாநகரத்தின் வேகமாக மாறிவரும் போக்குவரத்து சூழலுக்கு ஏற்ப மாநகரம் தயாராக வேண்டியதன் அவசியத்தை எடுத்துரைத்து கூறுகையில் “தூத்துக்குடி ஒரு துறைமுக நகரமாகவும், வேகமாக வளர்ந்து வரும் வர்த்தக மையமாகவும் உள்ளது. மாநகரம் வளர்ச்சியடையும் நிலையில், நிலையான மற்றும் சுற்றுச்சூழலுக்கு உகந்த போக்குவரத்து முறையை நோக்கி நாம் மாற வேண்டும். கடற்கரை மேம்பாடு, தேசிய தூய காற்றுத் திட்டம் கீழ் தொடர் நடைபாதைகள் அமைத்தல் மற்றும் மின்சார வாகனங்களை நோக்கிய மாற்றம் உள்ளிட்ட பல்வேறு நடவடிக்கைகளை ஏற்கனவே மேற்கொண்டுள்ளோம். கார் பயன்பாடும் அதிகரித்து வருவதால், மாநகரத்தின் வளர்ச்சிக்கு ஏற்ப போக்குவரத்து உட்கட்டமைப்பும் வளர்ச்சியடைவதை உறுதி செய்ய நாம் இப்போதே நடவடிக்கை எடுக்க வேண்டும்.”“பயன்பாட்டு வசதிகளை ஒருங்கிணைப்பதில் முன்னேற்றம் ஏற்பட்டுள்ளது. குறிப்பாக, மனைப்பிரிவுகளில் மின்மாற்றிகள் அமைக்கப்படும் இடங்களை முன்கூட்டியே திட்டமிடுவது போன்ற நடவடிக்கைகள் மேற்கொள்ளப்பட்டு வருகின்றன. அதே நேரத்தில், மாநகர எல்லைக்குள் சுமார் 76 கி.மீ. மாநில நெடுஞ்சாலைகள் உள்ளன. எனவே, தற்போது நடைபெற்று வரும் பணிகள் மற்றும் எதிர்காலத் திட்டமிடல் ஆகியவற்றில் அனைத்து தொடர்புடைய தரப்பினரும் ஒருங்கிணைந்து செயல்படுவது மிகவும் அவசியம். தற்போது மாநகரில் 206 பூங்காக்கள் உள்ளன. பொதுமக்களுக்கான பொது இடங்களின் மேம்பாட்டுப் பணிகளும் தொடர்ந்து மேற்கொள்ளப்பட்டு வருகின்றன. இத்தகைய அனைத்து முயற்சிகளும் நகரத்திற்கான ஒரு விரிவான மற்றும் ஒருங்கிணைந்த பார்வையின் கீழ் ஒன்றிணைய வேண்டும்,” மேலும் “போக்குவரத்து சிக்னல்களின் நேர நிர்ணயத்திலும் பாதசாரிகளின் தேவைகள் கருத்தில் கொள்ளப்பட வேண்டும். அனைவருக்கும் ஏற்ற வகையில் சாலைகள் செயல்படுவதை உறுதி செய்ய அனைத்து துறைகளும் நிறுவனங்களும் ஒன்றிணைந்து செயல்பட வேண்டும். பசுமைத் தடுப்புப் பகுதிகள், சாலை நடுப்பகுதி தடுப்புகள் மற்றும் மரங்கள் நிறைந்த பசுமை வழித்தடங்கள் ஆகியவையும் நமது சாலைகளைத் திட்டமிட்டு மேம்படுத்தும் முறையில் ஒருங்கிணைக்கப்பட வேண்டிய முக்கிய அம்சங்களாகும்.” என்று கூறினாா்.
முன்னாதாக எதிா்கால திட்டமிடல் குறித்த கையேடுகள் வௌியிடப்பட்டன.
பயிலரங்கில் தூத்துக்குடி மாநகராட்சியின் பொறியியல் மற்றும் திட்டமிடல் துறைகள், நெடுஞ்சாலைத் துறை, தமிழ்நாடு அரசு போக்குவரத்துக் கழகம், தமிழ்நாடு குடிநீர் வடிகால் வாரியம் , தமிழ்நாடு மின் உற்பத்தி மற்றும் பகிர்மானக் கழகம் நகர மற்றும் ஊரமைப்புத் துறை போக்குவரத்து காவல் துறை உள்ளிட்ட பல்வேறு துறைகளின் பிரதிநிதிகள் கலந்து கொண்டனர்.
தொழில்நுட்ப அமர்வுகளில், மக்களை மையமாகக் கொண்ட பொதுப் போக்குவரத்து தொடர்பான விளக்கக்காட்சி மற்றும் பரிந்துரைகள் வழங்கப்பட்டன. தொடர்ந்து ஆரோக்கியமான சாலைகள் கொள்கை மற்றும் வழிகாட்டுதல்கள் குறித்து விரிவான அமர்வு நடைபெற்றது. பங்கேற்பாளர்கள் என்எம்டி வலையமைப்பு திட்டமிடல் தொடர்பான நடைமுறைப் பயிற்சியிலும் ஈடுபட்டனர். கொள்கை மற்றும் வடிவமைப்பு தரநிலைகளை நடைமுறைப்படுத்தி, முன்னுரிமை அளிக்க வேண்டிய வலையமைப்புகள், மேற்கொள்ள வேண்டிய நடவடிக்கைகள் மற்றும் செயல்படுத்துவதற்கான வாய்ப்புகளை அடையாளம் காண்பதே இப்பயிற்சியின் நோக்கமாகும். மேலும், பல்வேறு துறைகளைச் சேர்ந்த அதிகாரிகள் ஆரோக்கியமான சாலை கொள்கைகளை தற்போது நடைபெற்று வரும் மற்றும் எதிர்காலத் திட்டங்களில் எவ்வாறு இணைப்பது என்பது குறித்து கலந்துரையாடினாா்கள்.
