தூத்துக்குடி உலகப் புகழ்பெற்ற திருச்செந்தூர் சுப்பிரமணிய சுவாமி கோவிலில் நடைபெற்று வரும் கந்த சஷ்டி திருவிழாவின் யாகசாலை பூஜைகளைப் படம்பிடிக்க ஊடகத்துறையினருக்கு அனுமதி மறுக்கப்பட்ட சம்பவம் சர்ச்சையை ஏற்படுத்தியுள்ளது. யாகசாலை பூஜைகளை ஒளிப்பதிவு செய்வதற்காக செய்தியாளர்கள் மற்றும் ஒளிப்பதிவாளர்கள் கோவில் நிர்வாகத்திடம் பலமுறை விளக்கம் கேட்டுள்ளனர். இந்து சமய அறநிலையத்துறையின் முறையான அனுமதியுடன் வந்த ஊடகத்துறையினருக்குக் கூட அனுமதி மறுக்கப்பட்டதாகக் கூறப்படுகிறது. மேலும், யாகசாலை பூஜைகளைப் படம்பிடிக்க வேண்டுமானால் நீதிமன்றத்தை அணுகி சிறப்பு அனுமதி பெற்று வர வேண்டும் என கோவில் நிர்வாகம் தரப்பில் தெரிவிக்கப்பட்டதாகக் கூறப்படுகிறது. இதனால் ஊடகத்துறையினர் யாராலும் யாகசாலை பூஜைகளைப் படம்பிடிக்க முடியாத நிலை ஏற்பட்டது. ஆனால், தற்போது யாகசாலை பூஜைகள் மற்றும் மூலவர் சன்னதியில் சுவாமியை மிக அருகில் இருந்து படம்பிடித்த காட்சிகள் சிலரால் சமூக வலைதளங்களில், குறிப்பாக இன்ஸ்டாகிராம் பக்கங்களில் பதிவிடப்பட்டு வைரலாகி வருகின்றன. ஊடகத்துறையினருக்கு அனுமதி மறுக்கப்பட்ட நிலையில், சமூக வலைதளங்களில் பதிவிடுபவர்களுக்கு மட்டும் எப்படி அனுமதி கிடைத்தது? அவர்களுக்கு யார் அனுமதி வழங்கியது? கோவில் நிர்வாகத்தின் விதிமுறைகள் அனைவருக்கும் பொதுவானதா அல்லது ஊடகத்துறையினருக்கு மட்டும் கட்டுப்பாடுகளா? கடந்த முறையும் ஊடகத்துறையினர் மீது வழக்குப் பதிவு செய்யப்படும் என கோவில் நிர்வாகம் தரப்பில் எச்சரிக்கை விடுக்கப்பட்டதாகக் கூறப்படும் நிலையில், தற்போது சமூக வலைதளங்களில் யாகசாலை பூஜை மற்றும் சுவாமி தரிசனக் காட்சிகளைப் பதிவிட்டவர்கள் மீது என்ன நடவடிக்கை எடுக்கப்பட உள்ளது? ஊடகத்துறையினரைத் திட்டமிட்டு புறக்கணிக்கிறதா திருச்செந்தூர் கோவில் நிர்வாகம்? நீதிமன்ற உத்தரவு மற்றும் அனுமதி நடைமுறைகள் அனைவருக்கும் சமமாகப் பின்பற்றப்படுகிறதா? இதற்கு இந்து சமய அறநிலையத்துறை அமைச்சர் உரிய விளக்கம் அளிக்க வேண்டும் என்பதே ஊடகத்துறையினரின் எதிர்பார்ப்பு.
நீதிமன்ற உத்தரவு காற்றில் பறக்க விடப்பட்டதா? ஊடகத்துறையினருக்கு ஒரு நீதி… சமூக வலைதளங்களில் பதிவிடுபவர்களுக்கு ஒரு நீதியா? – திருச்செந்தூர் கோவில் நிர்வாகம் மீது சர்ச்சை